Балаҕан ыйын 18 күнүттэн Айсен Николаевтыын «Быһа линияҕа» ыйытыылары хомуйуу саҕаламмыта. «Быһа линия» балаҕан ыйын 27 күнүгэр, Саха Өрөспүүбүлүкэтин судаарыстыбаннаһын күнүгэр буолуоҕа. Төрдүс күҥҥэ номнуо 270-тэн тахса ыйытыы киирдэ диэн региону салайар киин иһитиннэрэр.
Ол курдук, киин дааннайынан, колл-киин нөҥүө 101 ыйытыы киирбит, телеграм-бот нөҥүө — 171. Саамай элбэх ыйытыы Дьокуускайтан, Алданнааҕы уонна Нүөрүҥгүрүтээҕи оройуоннартан киирбит. Үгүс боппуруос хаарбах дьиэлэртэн көһүүнү, эбийиэктэри тутууну, тырааныспар уонна суол-иис хаһаайыстыбатын, ОДьКХ уонна энергетиканы, доруобуйа харыстабылын, үөрэхтээһини, социальнай төлөбүрү кытта сибээстээх.
Эфир балаҕан ыйын 27 күнүгэр олохтоох бириэмэнэн киэһэ 19:00 чаастан саҕаланыаҕа. Ил Дархан Айсен Николаев үгэс быһыытынан Саха сирин олохтоохторун ыйытыыларыгар хоруйдуоҕа, өрөспүүбүлүкэ сайдыытыгар туһуланар саҥа сыаллар-соруктар туһунан сырдатыаҕа.
Быһа эфири «НВК Саха», «Якутия 24», «Россия 24» ханаалларга, «Тэтим», «Радио России», «Виктория Саха», «СТВ-радио» араадьыйаларга уонна Айсен Николаев социальнай ситимнэригэр көрүҥ.
Ыйытыыларгытын @voprosGlaveYakutii_bot Telegram чат-ботка суруйан ыытыаххытын сөп эбэтэр колл-киин нүөмэригэр: 8 (4112) 506-006. Колл-киин үлэлиир бириэмэтэ: сарсыарда 9:00 чаастан киэһэ 18:00 чааска диэри.
Ону тэҥэ дьон-сэргэ ыйытыыларын «Быһа линия» кэмигэр Max мессенджер нөҥүө ыытар кыахтаныахтара диэн региону салайар киин иһитиннэрэр.
Ыйытыылары балаҕан ыйын 27 күнүгэр «Быһа линия» түмүктэниэр диэри туталлар.
Хаартыска: СИА
