2026 сыл саҕаланыаҕыттан ыла мобильнай биригээдэлэр Өрөспүүбүлүкэтээҕи киинэ Саха сирин 19 оройуонугар 42 сырыыны оҥордо. Быраастар 20 782 киһини көрдүлэр, ол иһигэр 7 359 оҕо уонна 5 706 хоту аҕыйах ахсааннаах норуоттар бэрэстэбиитэллэрэ буолар. Бу туһунан СӨ доруобуйа харыстабылын министиэристибэтэ иһитиннэрэр.
Мобильнай биригээдэлэр Өрөспүүбүлүкэтээҕи киинэ РФ бэрэсидьиэнэ көҕүлээбит «Продолжительная и активная жизнь» бырайыак, «Единая Россия» баартыйа «Здоровое будущее» бырайыагын, Ил Дархан көҕүлээбит «Новая модель организации первичной специализированной медицинской помощи в населённых пунктах Арктической зоны Республики Саха (Якутия)» регионнааҕы бырайыак сыалларын, соруктарын толорор.
Көһө сылдьар үлэ элбэх хайысхалаах улахан дьону, оҕолору көрөр, стоматологическай уонна психонаркологическай биригээдэлэринэн ыытыллар. Исписэлиистэр Өлөөн, Муома, Орто Халыма, Абый, Булуҥ, Анаабыр, Усуйаана, Үөһээ Дьааҥы, Аллараа Халыма, Эдьигээн, Эбээн Бытантай, Үөһээ Халыма, Аллайыаха, Ньурба, Кэбээйи, Үөһээ Бүлүү, Томпо, Уус Маайа, Хаҥалас уонна Нам улуустарыгар сырыттылар.
«Биһиги дьиэ кэргэммит аатыттан көһө сылдьар стоматологтар мобильнай биригээдэтигэр үрдүк хаачыстыбадаах көмөлөрүн иһин махтанабыт!» – диэн Үөһээ Бүлүү Өргүөт нэһилиэгиттэн Мачахтыров дьиэ кэргэн махтанар.
Оҕо биригээдэтэ Үөһээ Дьааҥы, Эбээн Бытантай, Аллайыаха, Эдьигээн, Булуҥ, Анаабыр, Орто Халыма, Муома улуустарыгар үлэлээтилэр. Тиис быраастарын көмөтө Үөһээ Халыма, Эбээн Бытантай, Булуҥ, Үөһээ Бүлүү, Томпо улуустарыгар оҥоһулунна. Оттон Абый улууһугар психонаркологическай бөлөх үлэлээтэ.
Билиҥҥи кэмҥэ элбэх хайысхалаах улахан дьону көрөр биригээдэлэр Хаҥалас, Үөһээ Бүлүү, Томпо улуустарыгар олохтоохтору көрө сылдьаллар. Өлүөхүмэ, Сунтаар, Кэбээйи, Өймөкөөн улуустарыгар сырыылар былааннаналлар.
