Өрөспүүбүлүкэтээҕи клиническай балыыһаҕа клиническэй эпидемиология отделыгар салайааччы эбээһинэһин толорооччу Мария Васильева нэһилиэнньэҕэ, мэдицинскэй үлэһиттэргэ быһыы туһалааҕын туһунан кэпсээтэ.
«Биһиги балыыһабытыгар ЯРКБ үлэһиттэрин көрөр кэбиниэккэ быһыы биэрэр пуун тэриллибитэ. Биһиэхэ 1 №-дээх поликлиникаттан быһыы биэрэр биригээдэ хас нэдиэлэ аайы бээтинсэҕэ кэлэр. Бүгүҥҥү күҥҥэ 1427 үлэһиттэн 1377 киһи быһыы ылла, 96,5%-ҥа тэҥнэһэр. Тэрилтэҕэ 70%-тан тахса киһи ревакцинацияны ааста», — диэтэ кини.
Кини этэринэн, 3,5% үлэһит доруобуйаларынан медотводтаах, сорохтор быһыыны ылар кэмнэрэ кэлэ илик (коронавируһунан ыалдьан баран үтүөрбүттэрин кэнниттэн алта ый буола илик).
«Быһыыны ылбыт үлэһит олох ыалдьыбат да диэххэ сөп. Холобур, биһиэхэ быһыы ылбыт үлэһиттэр кыһыл балаһаҕа үлэлииллэр. Кинилэр кыһыл зонаҕа сылдьан күн аайы ыалдьар кутталга сылдьаллар. Биһиги коллективнай иммунитеты ситистибит. Коронавирус утары маасабай вакцинация саҕаламмыта сыл буолла. Биһиги быһыы киһиэхэ туһалаах диэн эрэллээхтик бигэргэтэр кыахтаахпыт», — диэн Мария Васильева бэлиэтээтэ.
Өрөспүүбүлүкэтээҕи клиническай балыыһаҕа билигин 90% ыарыһах быһыы ылбатах, 10% киһи быһыы ылбыттар.
«Бүгүҥҥү күҥҥэ биһиэхэ 77 коронавируһунан ыалдьар киһи эмтэнэр.Былырыын күһүн ыалдьыбыт киһи ахсаана элбии сылдьыбыта — 420. Билигин ыалдьыы таһыма намтаата, ол эрээри олунньуга «Омикрон» штамнаах ыарыы кэлэр куттала баар. Онон хайаан даҕаны коронавирус утары быһыыны ыларгытыгар ыҥырабын. Вакцина ыллахпытына, бастатан туран, бэйэбитин харыстанабыт. Иккиһинэн, тулаллыыр дьоммутугар эмиэ харыстабыллаахтык сыһыаннаһабыт», — диэтэ быраас.
