Хаҥалас улууһун Чапаево сэлиэнньэтигэр дьиэлэрэ умайбыт дьоҥҥо «Мин Сахам сирэ XXI үйэҕэ» хамсааһын чэрчитинэн, өрөспүүбүлүкэ уонна муниципалитет бүддьүөтүттэн үбү тыырыахтара. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.
Саҥа дьиэни тутуу туһунан боппуруоһу өрөспүүбүлүкэ вице-премьерэ Кирилл Бычков көтөхтө. СӨ тутуу миниистирэ Павел Кылатчанов этэринэн, Чапаево сэлиэнньэтигэр тутарга, биэдэмистибэҕэ олорор дьиэ бэлэм бырайыактарын көрдүлэр.
«Биһиги Хаҥалас улууһун дьаһалтатын кытта Чапаево сэлиэнньэтигэр тутарга бырайыактары көрдүбүт. Бу Уус Алдан улууһун Дүпсү сэлиэнньэтигэр тутуллубут дьиэ бырайыага буолар. Ороскуота 20,784 мөлүйүөн солкуобайга тэҥнэһэр», — диэн миниистир эттэ.
Дүпсү сэлиэнньэтигэр тутуллубут элбэх кыбартыыралаах дьиэ бырайыагын холобур быһыытынан ылыахатара, инженернэй ситимин холбооһуҥҥа кыра уларыйыылар бааллар. Эбийиэги тутууга үбү «Мин Сахам сирэ XXI үйэҕэ» бүтүн өрөспүүбүлүкэтээҕи хамсааһын чэрчитинэн өрөспүүбүлүкэ уонна муниципалитет бүддьүөтүттэн тыырыахтара.
«Родные города и села» бырайыак үлэлиир бөлөҕүн мунньаҕар Кирилл Бычков, быйыл сайын тутууну саҕалыыр туһуттан, бырайыактыыр, ороскуоту ааҕар докумуону оҥорууну саҕалыырга, судаарыстыбаннай экспертизэ түмүгүн ыларга соруйда.
Санатан эттэххэ, муус устар 7 күнүгэр Чапаевоҕа икки этээстээх дьиэҕэ баһаар буолбута. Икки улахан киһи, икки оҕо суорума суолламмыта, тоҕус киһи эчэйбитэ.
Эрдэ Саха өрөспүүбүлүкэтин дьаһалтата баһаарга суорума суолламмыт уонна эмсэҕэлээбит ыалларга 2,45 мөл. солкуобайы көмө быһыытынан ыытарга быһаарбыта. Бу дьаһалга өрөспүүбүлүкэ бырабыыталыстыбатын бэрэссэдээтэлэ Андрей Тарасенко илии баттаата.
