Бүгүн, от ыйын 10 күнүгэр, Дьокуускай аэропордугар көҥүл тустууга эдэрдэргэ Европаҕа бастыыр иһин күрэхтэһии кыайыылаахтарын көрүстүлэр.
Амма улууһуттан төрүттээх спортсмен Андрей Мидловеһы аэропорка СӨ спорт миниистирэ Леонид Спиридонов көрүстэ. Ону тэҥэ тустуук төрөппүттэрэ, чугас дьоно, доҕотторо, СӨ физическэй культураҕа уонна маассабай спорка управлениетын салайааччыта Дмитрий Наумов, Чапчылҕан нэһилиэгин баһылыга Дьулустан Юшков уонна СӨ норуодунай депутата Александр Корякин көрсүһүүгэ кыттыыны ыллылар.
Санатар буоллахха, көҥүл тустууга эдэрдэргэ Европаҕа бастыыр иһин күрэхтэһиигэ Андрей Мидловец 61 киилэҕэ диэри ыйааһыҥҥа Джамал Аббасовы (Азербайджан) 6-1 ахсаанынан кыайан кыһыл көмүс мэтээли ылбыта.
