Чурапчы улууһун Чакыр сэлиэнньэтин олохтоохторо «2020-2025 сылларга тыа сирин кэлимник сайыннарыы» судаарыстыбаннай бырагыраама чэрчитинэн күөх төлөн утаҕар холбоннулар. Бу туһунан улуус дьаһалтатын пресс-сулууспата иһитиннэрэр.
«Улууһу гаастааһын бырайыага 2016 сылтан саҕаламмыта. 2017 сыллаахха бөһүөлэк иһинээҕи гаас турбалара уонна да атын ирдэнэр матырыйааллар бары аҕалыллыбыттара. Төһө да ыраах сытарбытын, экономическай ыарахаттары уонна пандемиянан сибээстээх олохтоммут уустуктары көрсүбүппүт үрдүнэн, бу бырайыагы ситиһиилээхтик түмүктээтибит. Бүгүн Чакыр олохтоохторо өрөспүүбүлүкэ салалтата ыытар социальнай хайысхалаах дьаһалларын бэйэлэрин эттэринэн-хааннарынан биллилэр», – диэн улуус баһылыга Андрей Ноговицын эттэ.
Күөх төлөн утаҕа уонна оптоволоконнай сибээс кэлиитэ, ону тэҥэ айан суолларын саҥардыы нэһилиэк демографиятын уонна олоҕун таһымын тупсарыыга төһүү күүс буолаллара бэлиэтэнэр. Чакыры гаастааһын сэлиэнньэ тэриллибитэ 310 сылаах үбүлүҥйүгэр сөп түбэстэ.
