Чурапчы улууһун Чыаппаратыгар «Доруобуйа харыстабыла» национальнай бырайыак чэрчитинэн саахалланар туруктаах тутуу оннугар саҥа амбулаторияны үлэҕэ киллэрдилэр.
Онно быраас хоһо, көрөр хос, прививочнай уонна процедурнай хостор, санитарнай хос, медикаменнары харайар хос баар буолуоҕа. Ону тэҥэ амболатория иһинэн хонуга суох сытар балыыһа үлэлиэҕэ.
«Бу 2023 сылга доруобуйа харыстабылыгар туһааннаах бастакы эбийиэги арыйдыбыт. Бүтэһик биэс сыл устата өрөспүүбүлүкэҕэ 65 ФАП уонна амбулатория тутулунна, 124 медицинскэй тэрилтэ өрөмүөннэннэ. Медицина инфраструктурата сайдан, өрөспүүбүлүкэ дьонун-сэргэтин доруобуйатын харыстыырга сүҥкэн хардыылары оҥорор», — диэн СӨ баһылыга Айсен Николаев эттэ.
Чурапчытааҕы киин балыыһа сүрүн бырааһын эбээһинэһин толорооччу Николай Сивцев бэлиэтээбитинэн, Алаҕар амбулаториятын 2019 сылга саахалланар туруктааҕын быһаарбыттар.
Амбулаторияҕа 1,5 мөл.солк. саҥа медицинскэй миэбэли, оборудованиены туруорбуттар: электрокардиограф, стерилизатордар, дефибрилятор уонна гинекологическай кириэһилэ. Бу барыта СанПИН ирдэбиллэригэр эппиэттиир маллар.
