Чурапчыга балыыһа саҥа комплекса тутулла турар, сотору кэминэн олохтоохтор улуустан ырааппакка биир сиргэ көрдөрөр буолуохтара. Бу туһунан СӨ Доруобуйа харыстабылын министиэристибэтин пресс-сулууспата иһитиннэрэр.
«Тутууну 2022 сыл кулун тутарыгар саҕалаабыттара, бу сыл бүтүөр диэри куорабын тутан бүтэриэхтэрэ. Оттон 2023 сыл төрдүс кыбаарталыгар үлэҕэ киирэрэ былааннанар», — бу туһунан Чурапчытааҕы киин балыыһа кылаабынай бырааһа Артем Ксенофонтов иһитиннэрдэ.
Саҥа тутууну эргэ балыыһаҕа сыһыары тутуохтара. Комплекска МРТ аппараатын туруорар хос баар буолуо.
«Инфарктаан уонна инсуллаан үтүөрбүт дьону чөлгө түһэриигэ күнүскү салааны арыйар баҕалаахпыт. Билигин маннык усулуобуйаны тэрийэр кыах баар буолла», — диэн кылаабынай быраас санаатын эттэ.
Үс этээстээх 3,8 тыһыынча квадратнай миэтэрэ иэннээх тутууга 23 куойкалаах терапия салаата, уон куойкалаах күнүскү стационар, сменаҕа 100 ыарыһахха учуоттаммыт поликлиника уонна хаһаайыстыбаннай булуок баар буолуо. Эбийиэги «Доруобуйа харыстабыла» национальнай бырайыак медицина бастакы бөлөҕүн саҥардыы бырагырааматын иитинэн туталлар.
