Бүгүн, алтынньы 29 күнүгэр, Чурапчы улууһун дьаһалтата анал байыаннай дьайыыга массыынаны уонна гуманитарнай көмөнү ыытта.
Бу туһунан улуус баһылыга Степан Саргыдаев бэйэтин телеграм-ханаалыгар иһитиннэрэр.
Байыастарга бу көмөнү улуус аатыттан координатордыы сылдьар Прокопий Максимов уонна Төлөй нэһилиэгин баһылыга Игорь Николаев тиэрдиэхтэрэ. Кинилэри бүгүн сарсыарда улуус Алтан Сэргэтиттэн алгыстаан атаардылар.
«Бу массыынаны ыларга улууспут дьоно-сэргэтэ бары күүс-көмө буоллулар. Массыынабыт тиийэн, уолаттарбытыгар этэҥҥэ сулууспалыа диэн эрэнэбит. Маны сэргэ күһүҥҥү муҥха сибиэһэй балыгыттан ыһаарылаабыт соболорун, тоҥ аһы, сылаас таҥаһы, бэйэбит туойбутуттан оҥоһуллубут харысхаллары, уустарбыт оҥорбут саха быһахтарын илдьэ бардылар. Антах тиийэн, наадыйар малларын-салларын эбии атыылаһан биэриэхтэрэ», — диэн улуус баһылыга телеграм-ханаалыгар суруйда.
Хаартыска: Степан Саргыдаев телеграм-ханаала
