Иван Винокуров аатынан Чурапчы оройуонун «Айылгы» норуот айымньытын дьиэтигэр Д.К Сивцев-Суорун Омоллоон аатынан тыйаатыр уонна опера балетын үҥкүүһүтэ, СӨ култууратын үтүөлээх үлэһитэ, «Золотая маска» бириэмийэҕэ саха балериналарыттан бастакы номинант Мария Кузьминаны биир дойдулаахтара үлэҕэ-хамнаска ситиһиитинэн эҕэрдэлээн тураннар уруйдаатылар-айхаллаатылар.
«Биллэн туран, бастакы учууталбынан олус ирдэбиллээх Наталья Семеновна Посельская буолар. Төрдүс кылаастан биһигини РФ уонна СӨ үтүөлээх артыыһа Оксана Ивановна Абрамова үөрэппитэ, кини кэнниттэн СӨ үтүөлээх артыыһыгар Зинаида Николаевна Поповаҕа уһуйуллан үөрэхпитин түмүктээбиппит. Бастакы сольнай үҥкүүнү, үрдүкү сценаҕа 2018 сыллаахха «Спартак» балекка үҥкүүлээбитим. Онно даҕаны алҕаска түбэспитим, эбиитин үҥкүүгэ партнербунан Сарыал Афанасьевтыын туруорбуттара»,-диэн Мария Кузьмина Чурапчы пресс-сулууспатыгар кэпсээбит.
Хаартыска: Сэмэн Жендринскэй
