COVID-19 утары быһыыны нэһилиэнньэҕэ туруорууга былааннарын толорбут Аллайыаха, Эдьигээн, Муома уонна Эбээн Бытантай улуустара биһирэниэхтэрэ. Бу туһунан СӨ бырабыыталыстыбатын уонна баһылыгын дьаһалтатын пресс-сулууспата иһитиннэрэр.
«2021 сыл от ыйын 6 күнүнээҕи туругунан, быһыыны туруоруу былаанын Эбээн Бытантай улууһа 93,5% толордо, Муома — 91,51%, Аллайыаха — 88,47%, Эдьигээн — 83,9%», — диэн иһитиннэригэ этиллэр.
Ил Дархан Айсен Николаев дьаһалынан ыйыллыбыт улуустарга доруобуйа харыстабылын тэрилтэлэригэр туһааннаах тиэхиньикэни ылалларыгар үп көрүллүөҕэ.
Дьокуускай куоракка нэһилиэнньэҕэ быһыыны туруоруу былаанын 84,56%-нан 3-с №-дээх өрөспүүбүлүкэтээҕи клиническэй балыыһа толорбута бэлиэтэнэр.
