Кулун тутар 26-28 күннэригэр Дьокуускай куоракка С.П. Королев аатынан III регионнар икки ардыларынааҕы ааҕыыларга улуустааҕы эбии үөрэхтээһин иһинэн Дүпсүн орто оскуолатын космонавтикаҕа уонна авиацияҕа түмэлин филиалын биэс экскурсовоттара финалга киирэн ситиһиилээхтик кытыннылар.
Сэттэ секцияҕа 300 кэриҥэ оҕо бэйэлэрин бырайыактарын көмүскээтилэр.
Оҕолорго умнуллубат түгэнинэн Россия Дьоруойа, летчик-космонавт Андрей Борисенконы кытта көрсүһүү буолла. Космонавт оҕолорго бэйэтин олоҕун, үлэтин кэпсээтэ, ыйытыыларга эппиэттээтэ.
III кылаас үөрэнээччитэ Күннэй Бурнашева «Космоюниор» секцияҕа кыттан «Ю.А.Гагарин космоска бастакы» диэн үлэтинэн ситиһиилээхтик кытынна (салайааччы Протопопова О.Ф.).
«Культура и литература» секцияҕа VI кылаас үөрэнээччитэ Айылана Шестакова бэйэтэ айбыт «Гусеница на Луне» фантастическай остуоруйатынан дьүүллүүр сүбэ сэҥээриитин ылла (салайааччы Протопопова О.Ф.).
«Культура и история космонавтики» секцияҕа XI кылаас үөрэнээччитэ Саша Нестерова «Я-гид-экскурсовод музея космонавтики и авиации» эссетынан виртуальнай экскурсия ыытан 1 миэстэни ылла (салайааччылар Протопопова О.Ф., Нестерова О.Н.).
«Медицина и биология» секцияҕа IX кылаас үөрэнээччитэ Валерия Сивцева уонна X кылаас үөрэнээччитэ Виктория Сивцева «Сублимированная еда для космонавтов» диэн бырайыактарынан бастаатылар (салайааччылар Протопопова О.Ф., Алексеева М.И.). Кыргыттар үс сыллаах үлэлэрин түмүгүнэн бэйэбит сирбитигэр үүнэр отоннортон оҥорон таһаарбыт «Вкус лета» набордарын космонавт Андрей Борисенкоҕа бэлэх ууннулар.
Дьэ, ити курдук, түмэл 50 сыллаах үбүлүөйүн көрсө оҕолор ситиһиилэрэ үгүс, үөрүүлэрэ муҥура суох.
