Дьааҥы Улахан Күөлүгэр баар бастакы гибриднэй уот станциятын бүгүн Илиҥҥи экономическай форум чэрчитинэн арыйдылар. Станция дизелинэн уонна күн уотунан барар.
Станция кыамтата 1125 кВт, ол иһигэр күнтэн — 400кВт. Билигин дизели туһаныы 45% кыччыахтаах.
«2024 сылга диэри өссө 71 нэһилиэккэ дизельнэй станциялары маннык тупсарар былааннаахпыт. 2022 сыл бүтүөр диэри Муома оройуонун Хонуу, Кулун Өлбүт, Саһыыр, Төбүлээх нэһилиэктэригэр уонна Дьааҥыга тутуллуохтара. 2023 сылга диэри 41 нэһилиэккэ, салгыы өссө 25 нэһилиэккэ маннык гибриднэй станциялар баар буолуохтара», — диэтэ Ил Дархан.
Станцияны Арктика уонна Уһук илин сайдыытын агентствота, «Комплексные энергетические решения» ХЭТ өйөбүлүнэн «РусГидро» тутта. Станцияны арыйыыга Ил Дархан Айсен Николаев, дойду энергетикэҕэ миниистирэ Николай Шульгинов, «РусГидро» генеральнай дириэктэрэ Виктор Хмарин, «Арктик Пауэр Кэпитал» генеральнай дириэктэрэ Владимир Тощенко кыттыыны ыллылар.
