Ахсынньы 30 күнүгэр диэри «Дальний Восток – Земля приключений» бүтүн Россиятааҕы айанньыттар куонкурустарын дьүүллүүр сүбэтэ кыттааччылартан сайаапкалары тутар. Билиҥҥи кэмҥэ 200-тэн тахса үлэ киирбит. Саха сириттэн куонкуруска алта киинэ баара биллэр.
Куонкуруска кыттыыны ыларга Уһук Илиҥҥэ айаннарын туһунан аҕыс мүнүүтэҕэ диэри уһуннаах тэттик киинэ уһулан, дьүүллүүр сүбэ сыанабылыгар ыыталлар. 2022 сыл балаҕан ыйыттан 2024 сыл ахсынньы 30 күнүгэр диэри уһуллубут видеолары туталлар.
«Дальний Восток – Земля приключений» куонкуруска улахан дьон дьаһалынан оҕолор 10 саастарыттан кыттыахтарын сөп. Онтон улахан дьон сааһыгар хааччах суох, баҕалаах барыта кыттар. Видеоны профессиональнай камераҕа, төлөпүөҥҥэ уһулуохха сөп.
Түмүккэ кыайыылаахтар харчынан наҕараадаланыахтара. Гран-при (лучшее видеопутешествие) – 3 мөл солк, «пешее, водное, зимнее» анал аат кыайыылааҕа 1 мөл солк, иккис миэстэҕэ — 300 тыһ солк, үһүс миэстэҕэ — 100 тыһ солк.
Күрэх Россия бэрэсидьиэнин Уһук Илиҥҥи Федеральнай Уокурукка боломуочуйалаах бэрэстэбиитэлэ Юрий Трутнев көҕүлээһининэн, Россия бэрэсидьиэнин Уһук Илиҥҥи Федеральнай Уокурукка боломуочуйалаах бэрэстэбиитэлин аппаратын, Россия Уһук Илин сайдыытын министиэристибэтин, АО «Уһук Илин уонна Арктика сайдыытын корпорациятын», НКО «социальнай көҕүлээһиннэр сайдыыларын пуондатын» көмөлөрүнэн ыытыллар.
