Сэтинньи 3-4 күннэригэр, Аҕа дойду Улуу сэриитин 75 сылыгар аналлаах «Диалог народов — диалог культур» регионнар икки ардыларынааҕы төрдүс форум саха сиригэр онлайн-көрүҥүнэн ыытыллыаҕа. Бу туһунан А.Е. Кулаковскай аатынан Норуоттар Доҕордоһууларын дьиэтин пресс-сулууспата иһитиннэрэр.
«Форум ыытыллар сыала: Россия байыаннай историятыгар уопсастыбаннас интэриэһин үрдэтии, үүнэр көлүөнэҕэ патриотическай өйү-санааны иитии уонна норуоттар икки ардыларыгар доҕордуу сыһыаны иҥэрии», — диэн иһитиннэриигэ этиллэр.
Форум чэрчитинэн «Аҕа дойду Улуу сэриитэ 1941-1945 сыллар: историческай өйдөбүнньүк уонна норуот Кыайыыга уһансыытын үөрэтии аныгы көрүүлэрэ» регионнар икки ардыларынааҕы научнай-практическай конференция, «Единство народов — сила России» онлайн-кэнсиэр, омуктар икки ардыларыгар хардарыта дьайсыы тиэмэтигэр семинардар буолаллара былааннанар. Тэрээһин Россияҕа Өйдөбүнньүк, Албан аат уонна Сомоҕолоһуу күнүгэр анаан ытыллыаҕа.
Тэрийээччилэр этэллэринэн, форумҥа регионнартан уонна дойду араас куораттарыттан кыттыахтара.
