РФ Куттал суох буолуутун хааччыйар сэбиэтин бэрэссэдээтэлин солбуйааччы Дмитрий Медведев Россияҕа ыытыллар мобилизация туһунан сурахтары сымыйа провокация диэн иһитиннэрдэ.
«Өстөөх дойдуга мобилизация бэлэмнэнэр диэн араас сымыйаны ыытар холонуута провокация эрэ буолар. Бу быыбар иннинээҕи пропаганда сорҕото. Кинилэр, биллэн турар, биһиги дойдубутугар быһыыны-майгыны дьиҥэ суох оҥоро сатыыллар, мөкү санаалары үөскэтэллэр», — диэн Дмитрий Медведев куттал суох буолуутун сэбиэтин биэдэмистибэлэр икки ардыларынааҕы хамыыһыйатын мунньаҕар эттэ.
Кини социальнай ситимнэргэ «мобилизацияны кэтэспэккэ эрэ харчы иһин сулууспалыы бар» диэн ис хоһоонноох хантараагы илии баттатарга ыҥырар таһаарыылар тарҕаналларын тоһоҕолоон бэлиэтээтэ. Кини этиитинэн, бу төлөнүллүбүт сымыйа сураҕы өстөөх тарҕатар.
Дмитрий Медведев боломуочуйалаах бэрэстэбиитэллэри, регионнар баһылыктарын уонна Оборуона министиэристибэтин бэрэстэбиитэллэрин бу боппуруоска болҕомтолорун ууралларыгар көрдөстө.
«Өссө биирдэ ордук чорботон бэлиэтиибин — мобилизацияҕа ханнык да наадыйыы суох. Бу дьоно тиийбэт, ким да сэриилэһэр кыаҕа суох өстөөх сымыйата буолар», — диэн кини эттэ.
Дьону-сэргэни официальнай эрэ иһитиннэриилэргэ итэҕэйэргэ ыҥырабыт.
Сыл бастакы алта ыйын иһигэр икки сүүс тыһыынча кэриҥэ киһи хантараак түһэрсибит. Ону таһынан, 16 тыһыынчаттан тахса киһи баҕа өттүнэн анал байыаннай дьайыы балаһатыгар барбыт. Пилота суох систиэмэлэр сэриилэрин састаабын толоруутугар үчүгэй тэтим ылыллыбыт, манна 40 тыһыынча кэриҥэ байыаннай сулууспаҕа киирбит. От ыйыгар састаабы толоруу тэтимэ оннунан хаалар. Сыл бастакы аҥаарын түмүгүнэн Сэбилэниилээх күүстэр састаапка наадыйыылара толору хааччыллыбыт.
