Бүгүн Чурапчы улууһугар СӨ бырабыыталыстыбатын бастакы солбуйааччы Дмитрий Садовников салайыытынан оробуочай бөлөх илин энэр улуустары мунньан сааскы халаан уутугар уонна ойуур баһаарын сэрэтэр үлэлэргэ хайдах бэлэмнээхтэрин көрдө, иһиттэ.
Ууну хаайар быһыттар туруктарын, ыксаллаах быһыыга-майгыга үлэлиир тиэхиньикэлэри, үлэһит ахсаанын көрдүлэр. Саха сиригэр эрдэ Ил Дархан сорудаҕынан команднай штабнай учениелар ыытыллан тураллар, ол эрээри федеральнай ыксаллаах быһыы-майгы министиэристибэтин бэрэбиэркэтин түмүгүнэн хомойуох иһин бэлэм ситэтэ суох диэн быһаарыллыбыт. Ол курдук, араас улуустар нэһилиэктэригэр минерализованнай балаһалары ситэ оҥорбокко итиэннэ саҥа киирби ирдэбилинэн ыксаллаах түгэҥҥэ нэһилиэнньэҕэ суһаллык иһитиннэрии тириэрдэр сириэстибэлэр суохтара бэлиэтэммит.
Бу ый бүтүүтэ эмиэ федеральнай бэрэбиэркэ ойуур хаһаайыстыбатын өттүттэн кэлэрэ былааннанар. Онуоха диэри баар итэҕэстэри туоратарга үлэ бара турар.
