СӨ бастакы вице-премьерэ Дмитрий Садовников Сунтаарга икки этээстээх чааһынай дьиэ баһаарыгар тыыннара быстыбыт дьон аймахтарыгар кутурҕанын биллэрдэ.
«Бүгүн түүн Сунтаарга улахан иэдээн таҕыста. Икки этээстээх чааһынай дьиэ умайан икки улахан киһи уонна түөрт оҕо тыына быһынна. СӨ баһылыгын уонна бырабыыталыстыбатын аатыттан дириҥ кутурҕаммытын биллэрэбит. Умайыы биричиинэтэ быһаарыллар. Миэстэтигэр силиэстийэлиир суһал бөлөх үлэлиир», — диэн кини Telegram-ханаалыгар суруйда.
Дмитрий Садовников бэлиэтээбитинэн, сыл саҕаланыаҕыттан өрөспүүбүлүкэҕэ 248 баһаар бэлиэтэммит. Сүрүн биричиинэ — элетрическэй оборудованиенан туһаныыга быраабыланы кэһии.
Россия ЫБММ Саха сиринээҕи салаатын аварийнай-быыһыыр үлэни ыытар уонна баһаары умуруоруу управлениетын начальнига иһитиннэрэринэн икки биричиинэ бэлиэтэнэр.
«Бастакыта — электрическэй ситим үлэтин кэһиллиитэ, иккиһэ — оһоҕунан ититии. Билиҥҥи туругунан Баһаары умуруоруу сулууспатын чинчийэр баһаарынай лаборатория экспертнэй тэрилтэтин силиэдэбэтэлэ, дознавателэ састааптаах сүрүн управление суһал бөлөҕө быһылаан тахсыбыт сиригэр айанныыр. Итиэннэ, СӨ Судаарыстыбаннай баһаары утары сулууспатын управлениетын аппараатыттан суһал бөлөх эмиэ барыаҕа», — диэтэ кини.
