Сааскы кэмҥэ «Дьокуускай – Аллараа Бэстээх» хайысханан 25-тэн 30-ка диэри салгын олбохтоох суудунаны үлэлэтэр былааннанар. Бу туһунан СӨ Тырааныспар уонна суол-иис хаһаайыстыбатын миниистирэ Владимир Сивцев «Актуальное интервью» биэриигэ иһитиннэрдэ.
Өрүс эстэр кэмигэр «Тайфун» аэроботтар сылдьыахтара. 204 дьоҕус түөлбэҕэ баар «Намыв» пуунтан Аллараа Бэстээххэ баар терминалга диэри дьону таһыахтара.
Владимир Сивцев бэлиэтииринэн, бүтэһик кэмнэргэ инфраструктураны тупсарар үлэлэр ыытыллыбыттар: сылаас терминаллар оҥоһуллубуттар.
«Бу үлэ салҕаныаҕа. Тырааныспарга куттал суох буолуутун хааччыйыыны күүһүрдэр, оҥоһуллар өҥөлөр хаачыстыбаларын үрдэтэр, сыананы айанньыт уйунарын хааччыйыы былааннанар», — диэн Владимир Сивцев эттэ.
Ону таһынан, салгын олбохтоох суудуналарынан таһыыны атын хайысхаларынан эмиэ тэрийиэхтэрэ.
Хаартыска: «Якутия 24»
