Муус устар 25 күнүгэр киин куорат Комсомольскай болуоссатыгар «Саха АССР 100 сылынан 100 оптуобус» бырайыак чэрчитинэн оптуобустар күлүүстэрин туттарыы буолла.
Тырааныспары атыылаһыыга федеральнай бүддьүөттэн 193 мөлүйүөн солкуобайы көрбүттэр, өрөспүүбүлүкэттэн — 120 мөлүйүөн солкуобайы.
«Эрдэ оптуобус паркатын маннык саҥардыы буолбатаҕа. Бу саҕалааһын эрэ буоларыгар эрэллээхпин, уопсастыбаннай тырааныспары салайыы саҥа систиэмэтэ, биир кэлим билиэт былааннанар. Бу оптуобустар Дьокуускай уонна чугас сытар оройуоннар тупсалларын туһугар үлэлиэхтэрэ», — диэн Ил Дархан Айсен Николаев бэлиэтээтэ.
Куорат уопсастыбаннай тырааныспарын Россия бырамыысаланнаһын уонна атыы-эргиэн министиэристибэтин гааһынан айанныыр тиэхиньикэ субсидиятын бырагырааматынан саҥатыттылар. Оптуобустар тыйыс усулуобуйаҕа сүүрэр аналлаахтар: икки хос таастаахтар, салон иһигэр эбии ититэр тэриллээхтэр уонна кондиционердаахтар.
Тырааныспардар бэлиэтээһини барытын ааһан маршрут ситиминэн ыам ыйын бүтүүтүттэн саҕалаан сылдьыахтара.
