Тохсунньу 25 күнүгэр киин куорат бородуукта атыылыыр маҕаһыыннарыгар дезинфекция ыытыыны бэрэбиэркэлээтилэр. Бу туһунан Дьокуускай дьаһалтатын пресс-сулууспата иһитиннэрэр.
Рейдэ кэмигэр 116 бородуукта маҕаһыынын , уопсастыбаннай аһы тэрийэр түөрт, иһэр уунан хааччыйар биир тэрилтэни бэрэбиэркэлээтилэр.
Куорат административнай хамыыһыйатын иһитиннэриитинэн, нуорманы кэһиини сэттэ бородуукта маҕаһыыныгар уонна киоскаҕа буллулар.
«Лонгинов аатынан уулусса 68/1 «Лонгинов» бородуукта маҕаһыына, «Фрукта уонна оҕуруот аһа» киоска, Билибин аатынан уулусса 23/1 «Туйгун» мини-маркет, Пирогов аатынан уулусса «Фрукта уонна оҕуруот аһа» киоска, Ларионов уулуссатын 16-с №-дээх дьиэтигэр баар «Народнай» дискаунтер дезинфекцияҕа сабыллыбатахтар, сууйуу-тарааһын ыытыллыбатах», — диэн иһитиннэриигэ этиллэр.
Маннык кэһии Дзержинскэй уулуссатын 8/3Б-гар баар фрукта уонна оҕуруот аһын киоскатыгар, Каландаришвили 25/1к1-гэр турар «У озера» киоскаҕа бэлиэтэммит.
Административнай хамыыһыйа бэрэссэдээтэлэ Феликс Антонов иһитиннэрбитинэн, сокуону кэһээччилэргэ актары толордулар, «Ыксаллаах быһыы-майгы кэмигэр, эбэтэр суоһуур кутталыгар быраабыланы толорбот буолуу» Россия КоАП ыстатыйатынан боротокуол толорон Гражданскай оборона, ыксаллаах быһыыга-майгыга нэһилиэнньэни уонна сири-уоту харыстыыр управлениетыгар ыыттылар.
Ил Дархан уонна суһал штаб дьаһалынан атыы-эргиэн кииннэрэ бэнидиэнньиккэ уонна оптуорунньукка үлэни тохтотон туран дезинфекцияны ыытыахтаахтар. Маннык дьаһаллары куоракка уустук эпидемиологическай балаһыанньа турбутунан ылбыттара.
Бэнидиэнньиккэ 08:00-тан 13:00 чааска диэри атыы-эргиэн, аралдьытар кииннэр, атыы-эргиэн комплекстара, дьаарбаҥкалар, ырыынактар уонна ас-үөл атыылыыр урбаанньыттар маҕаһыыннара сабыллаллар. Оптуорунньукка бу бириэмэҕэ бас билиититтэн тутулуга суох атыы-эргиэн тэрилтэлэрэ, араас табаарынан эргинээччилэр.
