Дьокуускай олохтооҕо 3 мөл солк албыннаппыт

63 саастаах Дьокуускай олохтооҕо үс мөлүйүөнтэн тахса солкуобайын түөкүттэргэ албыннаппыт. Бу туһунан ИДЬМ пресс-сулууспата иһитиннэрэр. Эрдэ кыбартыыратын атыылаан счетугар ууруна сыппыт харчыта эбит.
Балаҕан ыйын 29 күнүгэр дьахтарга баан үлэһитэбин диэн эр киһи эрийбит, счетугар ким эрэ киирэ сатыыр диэбит. Онтон атын түөкүнү кытта кэпсэтииннэрэн, сымыйа «страховой» счетка харчытын барытын ыыттарбыттар. «Харчытын туһугар куттанан, хаста да төхтөрүйэн 3 110 000 солкуобайы ол счетка ыыппыт. Ыытан эрэ баран, албыннаппытын өйдөөн, полицияҕа эрийбит», — диэн иһитиннэриигэ этиллэр.