Дьокуускай куорат тоҕус тэрилтэтэ олохтоохторго уонна өрөспүүбүлүкэ ыалдьыттарыгар анаан экскурсиялары бэлэмнээттэ. Бу туһунан ТАСС иһитиннэрэр.
Дьокуускайга эпидемиологическай быһыы-майгы этэҥҥэ буолла эрэ экскурсиялары саҕалыырга бэлэмнэр.
«Тэрилтэлэр испииһэктэригэр «ЭПЛ Даймонд» уонна «Киэргэ» ювелирнай хампаанньалар, сахалыы тыыннаах иһити-хомуоһу уонна сувенирдары оҥорор «Чороон XXI үйэ» уонна «Көмүлүөк» хампаанньалар, «Якутия» технопарк, «Сахабулт» национальнай концерн, «Якутия» ФАПК уонна Дьокуускайдааҕы килиэп кэмбинээтэ, «Сахачай» чаай оҥорор хампаанньа киирдилэр», — диэн Саха сиригэр туризмы уонна территориальнай маркетины сайыннарыы ааҕыныстыбатын генеральнай дириэктэрэ Наталья Тюкавкина кэпсээтэ.
Бырамыысыланнай туризм Саха сирин олохтоох бреннарын таһаарарга олус суолталаах инструмент буолар. Бу бастатан туран олохтоох оҥорон таһаарааччылары өйүүр тосхоллоох.
«Бу экскурчиалар туристарга, оҕолорго, устудьуоннарга уонна дьиэ кэргэттэргэ ананаллар. Бу иллэҥ бириэмэни атаарыы эрэ буолбакка, идэ талыыга көдьүүстээх инструменнартан биирдэстэрэ буолар. Хааччахтыыр миэрэлэр уһулуннахтарына ыалдьыттарбытын күүтэбит», — диэн Наталья Тюкавкина эттэ.
Хас биирдии тэрилтэ бэйэтин үлэлиир эйгэтиттэн көрөн туспа бырагырааманы бэлэмнээтэ. Ол курдук, «Киэргэ» ювелирнай хампаанньаҕа киэргэли оҥоруу бырассыаһын көрүөххэ уонна маастар-кылааска кыттыыны ылыахха сөп буолуоҕа.
«Сахабулт» маастардара күндү түүлээҕи имитиини уонна таба тыһыттан унтуу тигиитин көрдөрүөхтэрэ. «Якутия» ФАПК уонна Дьокуускайдааҕы килиэп кэмбинээтэ амтаннаах утаҕы уонна бурдук аһы оҥоруу хаамыытын көрдөрүөхтэрэ уонна бэйэлэрин бородууксуйаларын амсатыахтара. «Якутия» технопарк инновационнай оҥоһуктары уонна өрөспүүбүлүкэтээҕи IT-хампаанньалар бырайыактарын көрдөрүөҕэ.
