Дьокуускайга Россия Төрүт сокуонугар киирэр уларытыылары талар куоластааһыны ыытар 114 учаастак үлэтин саҕалаата. Бу туһунан СӨ баһылыгын уонна бырабыыталыстыбатын дьаһалтатын пресс-сулууспата иһитиннэрэр.
Өрөспүүбүлүкэ үрдүнэн уопсайа 800 кэриҥэ куоластыыр учаастак үлэтин саҕалыаҕа, билиҥҥи туругунан бары Роспотребнадзор ирдэбилигэр эппиэттиир бэйэни көмүскэнэр сириэстибэлэринэн толору хааччылыннылар: бэрчээккэлэр, мааскалар, халаттар, санитайзердар, тепловизордар, биирдэ туттуллар ручкалар.
Хамыыһыйа чилиэттэрэ, кэтээн көрөөччүлэр уонна куоластааччылар бары хааччыйыллыахтара. Куоластааһын бырассыаһа ыарыы тарҕаныытын сэрэтэр анал алгоритымынан ыытыллыаҕа.
«Биһиги пандемия кэмигэр араас таһымнаах быыбардары ыыппыт уонтан тахса дойду уопутун кытта билистибит. Куттал суох буолуутун хааччыйар миэрэлэрбит холобура суохтар. Биир да дойдуга маннык миэрэлэри түмүү оҥоһуллубатаҕа», — диэн Киин быыбардыыр хамыыһыйа баһылыга Элла Памфилова бэлиэтээтэ.
Куоластыыр учаастактар үлэлэрин эрэһиимин сайтка киирэн көрүөххэ, эбэтэр суһал нүөмэргэ эрийэн билсиэххэ сөп: 8-924-879-2020.
