Дьокуускай куорат баһылыга Евгений Григорьев, алтынньы 21 күнүгэр, Instagram ситим нөҥүө иһитиннэрбитинэн, өрөспүүбүлүкэ киинигэр уопсайа 990 элбэх кыбартыыралаах олорор дьиэлэр саахалланар туруктааҕын уонна көтүрүллүөхтээҕин быһаарбыттар.
«Бүгүн Строительнай уокурук управлениетыгар үлэлээтим. Мас дьиэлэргэ сырыттым, ону тэҥэ 17 кыбаартал дьиэлэрин көрдүм. Бүгүҥҥү күҥҥэ Дьокуускайга уопсайа 990 элбэх кыбартыыралаах олорор дьиэлэр саахалланар туруктаах уонна көтүрүллэрэ быһаарылынна. Ити дьиэлэргэ 30 тыһ. киһи олорор», — диэн кини суруйар.
Дьокуускай куорат дьаһалтата билигин 2025 сылга диэри саахалланар туруктаах дьиэлэртэн дьону көһөрүүгэ бырагырааманы олоххо киллэрэргэ үлэлэһэллэр диэн баһылык бэлиэтээтэ.
«Бырагыраамаҕа баара суоҕа 165 дьиэ киирэр. Биһиги дьиэ ахсаанын элбэтэр сыаллаахпыт. Владимир Путин бу бырагыраамаҕа эбии 45 миллиаpд солкуобайы ыытарга соруйбута. Оччоҕо дьиэ ахсаана элбиэн сөп, ол эрээри бу кыһалҕаҕа бэйэбит эмиэ үлэлэһиэхтээхпит», — диэтэ Евгений Григорьев.
