Бүгүн, кулун тутар 16 күнүгэр, Дьокуускай куоракка сыллата ыытыллар өрөспүүбүлүкэтээҕи Саха сирин судаарыстыбаннай уонна муниципальнай кииннээҕи бибилэтиэкэлэрин дириэктэрдэрин «Библиотеки Республики Саха (Якутия) в реализации государственных приоритетов в сфере культуры» диэн семинар-мунньахтара саҕаланна.
«Түөрт күннээҕи семинар кэмигэр салайааччылар бибилэтиэкэлэр ыытар үлэлэрин култуура эйгэтигэр турар судаарыстыбаннай сыаллары-соруктары киллэрэр хайысхаҕа ырытыахтара, саҥа ньымалары уонна ааҕыыны тарҕатыыга, историческай-патриотическай үөрэхтээһин бастыҥ быраактыкаларын үөрэтиэхтэрэ. Ону кытта тэрээһин кыттыылаахтара үлэ эппиэктээх ньымаларынан үүллэстиэхтэрэ, уопут атастаһыыта буолуоҕа. «Модернизация деятельности библиотек: Векторы развития современной библиотеки», «ИИ-технологии в библиотечной практике» диэн сиэксийэлэр үлэлэрэ былааннанар», — диэн СӨ Национальнай бибилэтиэкэ иһитиннэрдэ.
Семинар чэрчитинэн педагогическай наукалар хандьыдаата, «Общедоступные библиотеки субъекта РФ: стратегия развития и практика модернизации» диэн Петербургтааҕы бибилэтиэкэ уопсастыбатын вице-бэрэсидьиэнэ Сергей Басов ааптарскай бырагырааматынан квалификацияны үрдэтиигэ куурус ыытыллыаҕа.
Саха сиригэр 2018-2025 сылларга 62 саҥа култуура эбийиэгин арыйдылар, мантан үгүстэрэ дойду бэрэсидьиэнэ Владимир Путин көҕүлээбит «Култуура» национальнай бырайыагын чэрчитинэн киирбиттэрэ. Ааспыт сылтан бу бырайыак соруктарын «Дьиэ кэргэн» саҥа национальнай бырайыак толорор. 2025 сылга өрөспүүбүлүкэҕэ түөрт култуура эбийиэгэ тутулунна: Мэҥэ Хаҥалас улууһун Аллараа Бэстээх бөһүөлэгин Култуура сайдыытын киинэ, Сунтаар улууһун Кириэстээх сэлиэнньэтин Социальнай-култуурунай киинэ, ону тэҥэ Мэҥэ Хаҥалас Бөкө уонна Үөһээ Бүлүү Быракаан сэлиэнньэлэрин култуурунай-спортивнай комплекстара. Үс модельнай бибилэтиэкэ баар буолла: Горнай улууһугар П.Д. Аввакумов аатынан Киин бибилэтиэкэ, Уус Алдан улууһугар С. С. Васильев-Борогонскай аатынан Киин улуустааҕы бибилэтиэкэ, Мииринэй оройуонугар Оҕо бибилэтиэкэтэ. Баларга бэрэсидьиэн «Дьиэ кэргэн» национальнай барыйыагынан, «Биир Ньыгыл Россия» баартыйа «Культура малой родины» федеральнай бырагырааматынан 37,6 мөл тахса солк кээмэйдээх субсидиялар көрүллүбүттэр.
Хаартыска: sakha.gov.ru
