Ыам ыйын 25 күнүгэр өрөспүүбүлүкэ үрдүнэн Оһуохай күнэ бэлиэтэнэр. Бу бэлиэ күҥҥэ бары улуустар киин болуоссаттарыгар оһуохай түһүлгэтэ тэрилиннэ.
Өрөспүүбүлүкэ болуоссатыгар киин куорат олохтоохторо уонна ыалдьыттара Оһуохай күнүн бэлиэтээн, «Добун оһуохай» түһүлгэтигэр киирэн көхтөөх кыттыыны ыллылар.
«Сахабыт сирин бары олохтоохторо, Саха Өрөспүүбүлүкэтин болуоссатын тула мустубут дьоммут-сэргэбит! Эһигини барыгытын бүгүҥҥү Оһуохай күнүнэн ис сүрэхпиттэн эҕэрдэлиибин! Былырыыҥҥыттан Оһуохай күнүн өрөспүүбүлүкэҕэ бэлиэтээн саҕалаатыбыт. Оһуохай — өбүгэлэрбититтэн кэлбит биһиги култуурунай нэһилиэстибэбит. Онон бу төрүт үгэспитин үүнэр көлүөнэҕэ тиэрдэр — биһиги ытык иэспит. Бу доҕордоһуу, эйэ уонна таптал үҥкүүтэ. Оһуохай — төрөөбүт дойдуга таптал бэлиэтэ. Оһуохайдьыттар норуоттар доҕордоһууларын, төрөөбүт айылҕаларын уруйдууллар. Норуоппут сүдү баайын көлүөнэттэн көлүөнэҕэ тириэрдэ туруохха! Саха оһуокайыгар бары бииргэ биир санаанан Уруй-Айхал!», — диэн СӨ Бырабыыталыстыбатын бэрэссэдээтэлин солбуйааччы Сергей Местников эҕэрдэ тылын эттэ.
Ону тэҥэ муус устар 7 күнүттэн ыам ыйын 24 күнүгэр диэри «Куйаар далай түһүлгэ» өрөспүүбүлүкэтээҕи эдэр оһуохайдьыттар куонкурустара ыытылынна. Куонкуруска 13 улуустан 2594 киһи кытынна.
Бэҕэһээ Доҕордоһуу болуоссатыгар куонкурус финала буолбута. Манна 5 финалист оһуохайдаан III, II уонна I истиэпэннээх лауреаттары быһаарбыттар.
Бүгүн бэлиэ түгэнинэн Өрөспүүбүлүкэ сүрүн болуоссатыгар кыайыылаахтары биллэрдилэр.
Ол курдук, бастакы истиэпэннээх лауреат аатын Мэҥэ Хаҥалас улууһуттан Денис Оконешников ылла. Кыайыылаахха СӨ Бырабыыталыстыбатын аатыттан 120 тыһ солк суумалаах бириэмийэни туттардылар.
Саҕалаан эрэр этээччилэр ортолоругар бастаабыт Мэҥэ Хаҥалас улууһуттан кыттыбыт Айаал Аммосовка 100 тыһ солк суумалаах бириэмийэни биэрдилэр.
Кыайыылаахтар норуоттар икки ардыларынааҕы этнокултуурунай «Ёрдынские игры — игры народов Евразии» бэстибээлгэ кыттыыны ылар кыахтаннылар.
Бэстибээл от ыйын 3-6 күннэригэр Иркутскай уобаласка ыытыллыаҕа.
«Саха Өрөспүүбүлүкэтин Ил Дархана Айсен Николаев Оһуохай күнүн үөскэтэн, барытыгар сайдыылаах, элбэх оҕолоох Саха сиригэр — Оһуохай баар сиригэр, саха тыла сайдан иһиэ диэн эрэнэбит, өрөспүүбүлүкэбит баһылыгар саха оһуохайын өрө туппутугар улахан махталбытын тиэрдэбит! Саха сирин оһуохайын түмсүүтэ Дьокуускай куоракка үлэлээбитэ 40-чэ сыл буолла. Саха оһуохайын саҕалаабыттара: Николай Егорович Петров, Михаил Алексеев-Дапсы, Иван Егоров-Оһуохай Уйбаан уонна да атыттар билигин биһигини кытта бааллар. Оһуохайы өрө туппут дьоҥҥо, билигин кэлэн эҕэрдэлэһэр дьоҥҥо барҕа махтал!», — диэн Саха Өрөспүүбүлүкэтин Оһуохай түмсүүтүн баһылыга Александр Данилов-Дьулуур Хаан эттэ.
Үөрүүлээх тэрээһин оһуохай үҥкүүтүнэн түмүктэммитин видеоҕа көрүҥ.
Хаартыска: Андрей Сорокин / СИА
