Саха сирин дьоруой оҕолорун РФ Федеральнай мунньаҕын «За проявленное мужество» мэтээллэринэн киин куоракка алтынньы 29 күнүгэр наҕараадалаатылар. Ол курдук, наҕарааданы Ромеш Муратов, Роберто Ноев уонна Николай Жирков ыллылар.
Бу туһунан РФ ЫБММ Саха сиринээҕи салаатын Сүрүн управлениетын пресс-сулууспата иһитиннэрэр.
Ону таһынан дьоруой оҕолорго РФ ЫБММ Саха сиринээҕи салаатын салалтатын, СӨ Бырабыыталыстыбатын, Ил Түмэн, «Россия ийэлэрэ» уопсастыбаннай хамсааһын уонна өрөспүүбүлүкэ биэдэмэстибэлэрин, министиэристибэлэрин ааттарыттан махтал суруктары туттардылар.
Тэрээһиҥҥэ РФ ЫБММ Саха сиринээҕи салаатын Сүрүн управлениетын салайааччыта Павел Гарин махтал тылын эттэ.
«Сүрүн управление уонна бэйэм ааппыттан эһиги хорсун быһыыгыт, дьону быыһаабыккытын иһин ытыктабылбытын уонна махталбытын тириэрдэбин. Төрөппүттэргитигэр дьиҥнээх патриоттары иитэн улаатыннарбыттарыгар улахан махтал!», — диэн Павел Гарин эттэ.
Оҕолору XI бүтүн Россиятааҕы «Дьоруой-оҕолор» гражданскай-патриотическай бырайыак чэрчитинэн наҕараадалаатылар. Аахсыйа сүрүн кыттааччылара — 16 саастарын туола илик, дьоҥҥо көмөҕө кэлбит, дьоруойдуу быһыыны оҥорбут оҕолор.
Ол курдук, Ромеш Муратов ыам ыйыгар элбэх кыбартыыралаах дьиэҕэ дьон утуйа сыттаҕына баһаар тахсыбытыгар доруобуйатынан хааччахтаах ыаллыы олорор дьукааҕын уоттан быыһаабыт.
Онтон Роберто Ноев уонна Николай Жирков сайын умайа турар дьиэни көрөннөр, онно олорор доҕордорун эбээтин быыһыы сүүрбүттэр. Кинилэр гаражтар икки ардыларыгар сытар эргэ матырааһы буланнар, баһаарынайдар кэлиэхтэригэр диэри умайбыт дьиэҕэ олорор дьоҥҥо көмөлөспүттэр. Хата бу кэмҥэ доҕордорун эбээлэрэ дьиэтигэр суох эбит.
Хаартыска: РФ ЫБММ Саха сиринээҕи салаатын ВК бөлөҕүттэн
