Дьокуускайга эбии икки COVID-19 вируһун аналиһын чинчийэр лаборатория үлэтин саҕалыаҕа. Бу туһунан Ил Дархан Айсен Николаев өрөспүүбүлүкэҕэ коронавирустан олохтоммут усулуобуйа туругун боппуруостарынан күннэтэ ыытыллар суруналыыстары кытта көрсүһүү кэмигэр иһитиннэрдэ.
«Билиҥҥи туругунан Дьокуускайга Роспотребнадзорунан хааччыллыбыт икки лаборатория үлэлиир. Манна туох баар ирдэнэр аналистар чинчийиилэрэ ыытыллар. Бүгүн 3-с №-дээх балыыһа баазатыгар өссө биир лаборатория үлэтин саҕалыаҕа», — диэн Ил Дархан эттэ.
Маны тэҥэ, бу нэдиэлэ устата төрдүс лаборатория аһылларын туһунан бэлиэтээтэ.
«Бу көмөтүнэн чинчийиллэр аналистар ахсааннарын элбэтэр кыахтаныахпыт. Анализтары быраастар направленияларынан эрэ туттарыахха сөп», — диэн Айсен Николаев тоһоҕолоото.
