Өрөспүүбүлүкэ киин куоратыгар сарсыарда, кулун тутар 5 күнүгэр, Мархинка уулуссаҕа биир мэндиэмэннээх дьиэҕэ тутуллубут гараж умайбыт. Бу туһунан регионнааҕы ЫБММ пресс-сулууспата иһитиннэрэр.
Баһаар буолбутун туһунан иһитиннэрии баһаарынай-быыһыыр сулууспаҕа олохтоох бириэмэнэн 08.29 чааска киирбит.
«Миэстэтигэр Россия ЫБММ баһаарынайдара тиийбиттэр. Баһаарынай кэлиитигэр гараж аһаҕас уотунан умайа турбут. Тоҕус киһини эвакуациялаабыттар. Баһаар түмүгэр гараж барыта, үс автопогрузчик уонна оҥорон таһаарар сыах эмсэҕэлээбиттэр», — диэн пресс-сулууспа иһитиннэрэр.
Баһаар уопсай иэнэ 450 квадратнай миэтэрэҕэ тэҥнэстэ. Баһаарынайдар суһал дьайыыларынан хаһаайыстыбаннай тутуулар, пиломатырыйааллар уонна административнай дьиэ быыһаннылар.
Баһаар биричиинэтэ — оттук хочуолунайы туһаныыга баһаартан куттал суох буолуутун быраабылатын кэһии буолар. Буруйдаах уонна хоромньу быһаарыллар.
Уоту умуруорууга 38 киһи уонна аҕыс тиэхиньикэ үлэлээтэ.
