Искэҥ ыарыылаах оҕолор уонна кинилэр аймахтара Дьокуускайга, Людмила Николаева көҕүлээһининэн аһыллыбыт, босхо гостиница өҥөтүнэн туһанар кыахтаннылар. Бу туһунан СӨ баһылыгын уонна бырабыыталыстыбатын дьаһалтатын пресс-сулууспата иһитиннэрэр.
«Виктория» гостиницаҕа Дьокуускайга дьиэ куртамнаһар эбэтэр гостиницаҕа олорор кыаҕа суох, Өрөспүүбүлүкэтээҕи 1-кы №-дээх балыыһа — Медицина национальнай киинин онкогематология салаатыгар эмтэнэр оҕолор уонна кинилэр төрөппүттэрэ түһүөхтэрин сөп. Гостиница медицина кииниттэр чугас турара этиллэр.
Онкогематология салаатын уопсастыбаннай куратора Людмила Николаева көҕүлээһинин «Алмазэргиэнбанк» бырабылыанньатын бэрэссэдээтэлэ Николай Долгунов, «Сэттэ» бөлөх хампаанньа салайааччыта Андрей Данилов уонна гостиница хаһаайына Татьяна Яковлева өйөөтүлэр.
365 куойка-күҥҥэ сертификаты Медицина национальнай киинин генеральнай дириэктэригэр Николай Лугиновка туттардылар.
«Хайа баҕарар бизнес, бастатан туран, дьон туһунан саныахтаах, көмө көрдүүр дьоҥҥо көмөлөһөр уонна өйөбүл оҥорор кыаҕы көрдүөхтээх. Бу хайысхаҕа «Алмазэргиэнбанк» барыыс ылыыга уонна клиеннэргэ үп-харчы өҥөтүн оҥорууга эрэ үлэлээбэт, ону тэҥэ уонтан тахса сыл устата корпоративнай социальнай эппиэтинэһи систиэмэлээхтик олоххо киллэрэр. 2008 сылтан Медицина национальнай киинин онкогематология салаатын кытта бииргэ үлэлэһэр», — диэн Людмила Николаева эттэ.
Искэҥ ыарыылаах оҕолору эмтиир салааҕа судаарыстыба өттүттэн улахан өйөбүл оҥоһулларын үрдүнэн, үгүс түбүк элбэҕин бэлиэтээтэ. Онон тэрилтэ саҥа механизмнары тобулуутун тохтоппот.
