Билиҥҥи туругунан Өрөспүүбүлүкэтээҕи клиническэй балыыһа инфекционнай салаатыгар коронавируһунан ыалдьыбыт дьону эмтииргэ сүүс миэстэ тэриллэн турар.
«Балыыһа үлэтэ ураты кутталаах инфекциялары кытта үлэ быраабылатыгар уонна ирдэбилигэр толору олоҕуран ыытыллар», — диэн балыыһа коронавируһу эмтиир салаатын сэбиэдиссэйэ Владилена Иванова кэпсээтэ.
Муус устар 7 күнүн туругунан манна коронавируһунан ыалдьыбыттара чахчы бигэргэтиллибит тоҕус киһи уонна тумуу ыалдьыбыт дьону кытта алтыспыт тумуу сибкиклээх тоҕус киһи эмтэниини ааһар. Коронавирустаабыт ыарыһахтар туруктара ортотунан этэҥҥэ, икки дьахтар туруга орто.
Ыарыһахтары эмтээһин уларыйа турар клиническэй сүбэлэргэ олоҕуран ыытылларын уонна хайыы үйэ 5-c ыйынньык тахсыбытын сэбиэдиссэй бэлиэтээтэ.
Балыыһа бары үлэһиттэрэ дьиэ кэргэннэриттэн тэйитиллэн гостиницаҕа олороллорун уонна атын дьону кытта алтыспаттарын Владилена Иванова тоһоҕолоото. Үлэһиттэргэ анаан бары усулуобуйа тэриллибитэ уонна анал тырааныспарынан тиэйии оҥоһуллара этиллэр.
Быраастар нэдиэлэ ахсын коронавирус инфекциятын аналиһын туттараллар.
