«Квартал труда» креативнай кластер резиденэ өрөспүүбүлүкэ оройуоннарыгар аныгы киинэ салаатын бырайыагын сайыннарар былааннаах. Бу туһунан Саха сирин баһылыгын уонна бырабыыталыстыбатын пресс-сулууспата иһитиннэрэр.
«Россияҕа 150 тыһыынчаттан тахса нэһилиэнньэлээх пууннарга баара-суоҕа 2150 эрэ киинэ тыйаатыра баар. Мантан үгүһэ дойду киин куораттарыгар баар. Дойду 30%-н олохтооҕо, ол эбэтэр 44 мөл. киһи киинэ тыйаатыра суох хаалар. Тыа сиригэр киинэ суох, биһиги бу кыһалҕаны быһаарыахпыт», — диэн «MAGDIS» устуудьуйа продюссера Петр Чиряев эттэ.
Бу сыалга EIKI Япония хампаанньатын тэҥҥэ EK-357U ураты проектор уонна ExtraCinema цифровой платформа оҥоһулунна.
«Бу систиэмэҕэ шифровкаламмыт контент киирэр, ону уорар табыллыбат. Онно бары операциялары кэтээн көрүү баар. Атыннык эттэххэ, ханнык баҕарар тыа кулуубугар проектор туруордахха, киинэни туйгун хаачыстыбаҕа бэйэтэ хачаайдыыр. Киинэни көрөөччүлэргэ көрдөрөн баран, ылыллыбыт бириэмэтин кэнниттэн бэйэтэ сотторон иһэр», — диэтэ Чиряев.
Бу бырайыагы бастаан Саха сиригэр холбуохтара, оттон ол кэннэ Россия атын регионнарыгар тарҕатыахтара. «MAGDIS» киинэ устуудьуйа «Рядовой Чээрин» киинэни таһаарбытынан биллэр.
