Бүгүн Россия Судаарыстыбаннай былааҕын күнүгэр Дьокуускайга «Курск, мы с тобой!» диэн Курскай уобаласка эмсэҕэлээбиттэргэ гуманитарнай көмөнү хомуйуу саҕаланыа.
«Курскай уобаласка өстөөх сокуоннайа суохтук кимэн киирбититтэн олохтоохтор эмсэҕэлээбиттэрэ. Кинилэри өйүүр сыалтан Саха сирин дьоно гуманитарнай аахсыйаларга кытталлар. Бүгүҥҥү күҥҥэ биһиги биир сомоҕо күүс буолан түмсэн Курскай уобалас олохтоохторун өйүүбүт. Дойдубут «Курск, биһиги бары эйигин кытта!» диэн санаанан салайтарар», – диэн СӨ тас сибээскэ уонна норуоттар дьыалаларыгар миниистирэ Гаврил Кириллин эттэ.
Тэрээһин бүгүн, атырдьах ыйын 22 күнүгэр, киэһэ 17 ч. киин куоракка А.Е.Кулаковскай аатынан норуоттар доҕордоһууларын дьиэтин аттыгар, «АртАтриум – сквер К.Маркса» диэн былаһааккаҕа арыллыа.
Аахсыйа бырагырааматынан дьон-сэргэ, уопсастыбаннай тэрилтэлэр уонна коммерческайа суох түмсүүлэр гуманитарнай көмөҕө кыттарга ыҥырыллаллар.
«Курск, мы с тобой!» аахсыйаны СӨ тас сибээскэ уонна норуоттар дьыалаларыгар министиэристибэтэ уонна А.Е.Кулаковскай аатынан норуоттар доҕордоһууларын дьиэтэ тэрийэн ыыталлар.
Санатарбыт курдук, ааспыт нэдиэлэҕэ Норуоттар доҕордоһууларын дьиэтигэр Курскай уобаласка көмө быһыытынан биир туоннаттан тахса гуманитарнай көмө хомуйуллубута.
