Дьокуускайга мөлтөхтүк саҥарар оҕолорго
өрөспүүбүлүкэтээҕи анал (коррекционнай) оскуола-интэрнээт тутуута саҕаланар. Бу туһунан СӨ тутууну уонна дьиэни-уоту кэтээн көрүү судаарыстыбаннай управлениетын пресс-сулууспата иһитиннэрэр.
Бырайыагынан 120 оҕо үөрэнэригэр ананар оскуола икки мэндиэмэннэнэр, уопсай иэнэ 3012,35 кв. м. Итиэннэ 100 миэстэлээх үс мэндиэмэннээх интэринээттэнэр. Интэринээт уопсай иэнэ 1816,60 кв. м. Икки дьиэ сылаас галереянан холбоноллор.
«Коррекционнай оскуола бырайыага оҕо саҥатын кыһалҕаларын үөрэтии хаамыытынан уратыларын учуоттан оҥоһуллубута. Билигин тутуу надзордын инспектордара эбийиэктэр бэрэбиэркэлииргэ бырагыраама оҥороллор», — диэн СӨ тутууну уонна дьиэни-уоту кэтээн көрүү судаарыстыбаннай управлениетын салайааччытын бастакы солбуйааччы Влад Пермяков иһитиннэрэр.
Аныгы үйэ ирдэбилигэр эппиэттиир үөрэнэр куорпуска мультимедийнэй тэриллээх кылаастар, мастарыскыайдар, успуорт саалата, 60 оҕо аһыыр остолобуойа, бибилэтиэкэ, аактабай саала, логопед, эбии дьарык, айар дьоҕуру сайыннарарга хостор баар буолуохтара. Маны сэргэ, оскуолаҕа анал көтөҕөр лииптэр көрүллэллэр. Оттон интэринээккэ утуйар хостору таһынан, медицинскэй блок, куруһуоктар ыытыллар сирдэрэ, сынньанар уонна релаксация хосторо баар буолуохтара. Дьиэ таһыгар оонньуур былаһаакка уонна успуордунан дьарыктанар сир былааннаналлар.
Мөлтөхтүк саҥарар оҕолор үөрэнэр оскуолаларын тутуу судаарыстыбаннай-чааһынай бииргэ үлэлээһин мэхэньиисиминэн олоххо киллэриллэр.
