Бэс ыйын 20 күнүттэн Дьокуускай куорат историятын түмэлигэр худуоһунньуктар сойуустарын чилиэннэрэ Мира Аргунова уонна Дмитрий Руфов «Летние радости» диэн быыстапкалара үлэтин саҕалаата.
Быыстапкаҕа биллиилээх худуоһунньук аан дойду араас муннуктарыгар сылдьан уруһуйдаабыт саҥа хартыыналара турдулар. Икки талааннаах дьону төрөөбүт дойдуга таптал уонна сайын тиэмэтэ ситимниир. Манна Уһук Илин айылҕата, тыйыс Таймыыр көстүүлэрэ барыта баар.
Быыстапка үөрүүлээх арыллыытыгар искусство диэйэтэллэрэ, култуура эйгэтин үлэһиттэрэ кытыннылар. Дьокуускайдааҕы өрөспүүбүлүкэ офтальмологическай клиническэй балыыһатын сүрүннүүр бырааһа Иван Луцкан быыстапка туһунан санаатын эттэ.
«Худуоһунньук Дмитрий Руфов быыстапкатыгар 14 сыллаҕы үлэтин түмпүт, ааптар араас өрүттээх буолуутун уонна тус сыалы тутуһарын билиэтии көрдүм. Мира айар үлэтинэн киһи сири-дойдуну уратытык көрөр, ылынар. Икки сыл анараа өттүгэр Мира харах балыыһатын кытары бииргэ үлэлэһэн турардаах. Биһиги кинини кытары инникитин да үлэлиэхпит, худуоһунньуктар сойуустарын кытары эмиэ үлэлэһэр былааннаахпыт. Дьон искусствоҕа чугас буолуохтаах, Саха сиригэр олорор ааптардар ааттарын билиэхтээхтэр».
Дьокуускай куорат историятын түмэлин дириэктэрэ Александр Ноговицын бэлиэтииринэн, быыстапка иитинэн элбэх тэрээһин ыытыллара былааннанар. Саха сирин дьонун-сэргэтин быыстапкаҕа сылдьарга ыҥыраллар.
