Регион киин куоратыгар Опера уонна балет тыйаатырыгар РФ Дьоруойа Дмитрий Егоровы тиһэх суолугар атаарыы сиэрэ-туома буолла.
РФ Дьоруойун кытта бырастыылаһыы сиэригэр-туомугар чугас дьоно, Ил Дархан Айсен Николаев, тустаах министиэристибэлэр уонна биэдэмистибэлэр үлэһиттэрэ кэлбиттэр.
«Дмитрий Николаевич олус сырдык уонна дьоһун олоҕу олордо. Кини төрөөбүт дойдутун таптыырын аан дойдуга хорсуннук-хоодуоттук киирсэн көрдөрдө. Мин Дмитрий Николаевич Егоров курдук биир дойдулаахпынан киэн туттабын. Саха хорсун-хоодуот буойуна сырдык аата куруук тыыннаах буолуо. Быдан дьылларга быраһаай!», – диэн Ил Дархан эттэ.
Тихоокеанскай флот хамандыырын бастакы салайааччыта, вице-адмирал Сергей Рекиш РФ Дьоруойун аҕатыгар уонна чугас дьонугар «Көмүс сулус» мэтээли туттарда.
Санатар буоллахха алтынньы 9 күнүгэр Владимир Путин ыйааҕынан хорсуннук сэриилэһэ сылдьан тыына быстыбыт Дмитрий Егоровка РФ Дьоруойа ааты иҥэрбитэ.
РФ Дьоруойун Сунтаар улууһугар төрөөбүт сирин буоругар кистиэхтэрэ.
