Кулун тутар 7-8 күннэригэр өрөспүүбүлүкэ киин куоратыгар Роман Дмитриев кэриэһигэр юниордар ортолоругар норуоттар икки ардыларынааҕы күрэхтэһии буолуоҕа. Бу туһунан «Триумф» спорт киинэ иһитиннэрэр.
Икки күн устата көбүөргэ 2006-2008 сыллаах төрүөх эдэр бөҕөстөр киирсиэхтэрэ.
Турнир сахалартан бастакы Олимпийскай чемпион, ССРС спордун үтүөлээх маастара, Советскай Сойуус уонна Российскай Федерация үтүөлээх тренерэ Роман Михайлович Дмитриев сырдык аатыгар ананар.
«Быйыл от ыйын 31 күнүгэр Канада Монреаль куоратыгар Чурапчытааҕы спортивнай оскуола-интэринээт тренерэ Дмитрий Петрович Коркин иитиллээччилэрэ Павел Пинигин кыһыл көмүс, Роман Дмитриев уонна Александр Иванов үрүҥ көмүс мэтээллэри ылан, саха тустуутун үйэлэргэ умнуллубат улахан өрөгөйдөрүн 50 сыла буолар», — диэн иһитиннэриигэ этиллэр.
Күрэхтэһии «Триумф» спорт киинигэр ыытыллар. Киириитэ босхо.
Телевизорга турнир быһа эпиирэ НВК «Саха» уонна «Триумф» ханаалларга көстүөҕэ. Оттон интернеккэ – «Кыах» социальнай ситимнэригэр.
