«Туймаада хочотун саллаата» мемориалга өстөөҕү кыраҕы хараҕынан суох оҥорбут, Улуу Кыайыыны уһансыбыт снайпердарга анаан паамытынньык арыйдылар.
«Аҕа дойду улуу сэриитигэр, саха снайпердара мындыр өйдөрүнэн, тулуурдарынан, дьулуурдарынан, күүстээх санааларынан, өстөөҕү «харахха» түһэрэллэринэн биллэлэрэ», — диэн Ил Дархан Айсен Николаев монумент арыллыытыгар бэлиэтээн эттэ.
1942 сыллаахха «СНАЙПЕР» диэн түөскэ кэтиллэр мэтээл олохтоммутун кэнниттэн, 100-тэн тахса саха буойуна чиэстэммитин киэн тутта кэпсиир Айсен Николаев.
Скульптура Федор Попов, Михаил Стрекаловскай, Иван Кульбертинов, Алексей Миронов, Дмитрий Гуляев, Егор Петров курдук уһулуччулаах снайпердар хорсун быһыыларын көрдөрөр. Пааматынньык Кыайыы 75 сылыгар ананар.
