Олунньу 3 күнүгэр Дьокуускай куорат Сайсары күөлүгэр, «Сайдар-Парк» саҥа пааркаҕа, үөрүүлээх быһыыга-майгыга өрөспүүбүлүкэтээҕи «Тооку доҕотторун ыҥырар. Союзмультфильм Саха сиригэр» диэн муус оҥоһуктарын бэстибээлэ арылынна. Тэрээһин олунньу 7 күнүгэр диэри буолуоҕа.
Бэстибээл аатырбыт киинэ устуудьуйатын үбүлүөйдээх 90 сылыгар ананар. Биэс күн устата Саха сирин бастыҥ маастардара 3,5 миэтэрэттэн итэҕэһэ суох үрдүктээх Умканы, Винни-Пуҕу, Карлсоны, «Ну, погоди!» уонна «Простоквашино» дьоруойдарын, уонна да атын дьон-сэргэ таптыыр дьоруойдарын мууһунан чочуйан оҥоруохтаахтар.
Саха сирин сайдыытын корпорациятын айар индустриятын сайдыытын дириэктэрэ Петр Гоголев бэлиэтииринэн, бэстибээл сүрүн соруга — олохтоох дьон талааннарын көрдөрүү.
«Бу куонкурус уонна бэстибээл Саха сирин айар индустрията федеральнай таһымҥа тахсарыгар көмө буолуо диэн эрэнэбит. Тэрээһин куорат күннээҕи олоҕор биир чаҕылхай түгэн быһыытынан өйдөнөн хаалыа, оттон саҥа «Сайдар-парк» Дьокуускай куоратын олохтоохторугар уонна ыалдьыттарыгар таптыыр кыһыҥҥы сынньалаҥнарын сирдэрэ буолуо диэн эрэллээхпин», — диэн Петр Гоголев эттэ.
«Тооку» телеханаал шеф-эрэдээктэрэ Анна Кириллина бэлиэтииринэн, бэстибээл идиэйэтэ былырыыҥҥы «Тооку Фест» анимация бэстибээлигэр төрөөбүт.
«“Союзмультфильм” өрөспүүбүлүкэбитигэр анимация сайдыытын өйүүрэ биһиэхэ улахан чиэс буолар. Бу муустан оҥоһуктар айар дьоҕурдаах дьону саҥаҕа тардыа, оттон ойуулуктарбыт өссө биллиэхтэрэ-көстүөхтэрэ диэн эрэнэбит. Аан дойдуга биллибит маастардар манна кытталлара олус диэн үөрдэр. Холобура, биир маастар Харбиҥҥа ыытыллыбыт муус оҥоһуктарын куонкуруһун кыайыылааҕа буолар», — диэн Анна Кириллина эттэ.
Бу иннинэ «Союзмультфильм» генеральнай дириэктэрэ Борис Машковцев бэлиэтээбитинэн, устуудьуйа үбүлүөйэ — дойду бары көрөөччүлэрин кытта көрсөр кыах.
«Союзмультфильм» 90 сыла – бу тапталлаах дьоруойдары санаан ылыы, дойду үрдүнэн көрөөччүлэрин кытта көрсүһэр түгэн. Муус оҥоһуктарын бэстибээлэ Саха сиригэр – ураты култууралаах уонна күүстээх уус-уран үгэстэрдээх региоҥҥа – ыытыллара ордук суолталаах», – диэбитэ Борис Машковцев.
Куонкурус кыайыылаахтарын туох күүтэрий?
Кыттыылаахтар үлэлэрин дьүүллүүр сүбэ быһаарыаҕа. Сүрүн бириис – 200 тыһыынча солкуобай. Иккис миэстэни ылбыт маастар 150 000 солк, оттон үһүс миэстэҕэ тиксибит 100 000 солк наҕараадаланыахтара. Бары кыттыбыт хамаандаларга бириис көрүллүбүт.
Олунньу 7 күнүгэр наҕараадалары туттарыахтара уонна бу күн бэстибээл сабыллыыта буолуоҕа.
Ил Дархан Айсен Николаев бу иннинэ бэлиэтээбитинэн, өрөспүүбүлүкэ айар экономиканы өйүүргэ уопута дойдуга бастыҥынан билиниллибитэ. 2025 сылга саха киинэтин каассабай хомуура 280 мөлүйүөн солкуобайга тэҥнэспитэ. РФ бэрэсидьиэнэ Владимир Путин сорудаҕынан Дьокуускайга толору цикллаах киинэ павильонун оҥоруу былааннанар.
Санатарбыт курдук, куонкуруһу «Союзмультфильм» киинэ устуудьуйата, «Орион» хампаанньа, «Саха» НКИХ уонна Саха сирин сайдыытын корпорацията тэрийэллэр.
Хаартыска: Майя Дмитриева/«Якутия 24»
