Киин куоракка Дмитрий Сивцев олорбут дьиэтин сөргүтэн оҥоруохтара уонна өрөмүөн үлэтин бастакы түһүмэҕин саҕалыахтара.
100yakutia.ru сайтка этиллэринэн, үлэһиттэр дьиэ кырыыһатын уонна эбии тутууну көтүрбүттэр.
19-с үйэ бүтүүтүнээҕи дьиэ Чернышевскай аатынан уулусса 26-с дьиэтигэр баар. Саха сирин норуодунай суруйааччыта 50-с сылларга манна биир кыбартыыраҕа олорбута. 2015 сыллаахха дьиэ баһаарга эмсэҕэлээбит.
Пааматынньыктары уонна култуураны харыстыыр бүтүн россиятааҕы уопсастыба Саха сиринээҕи салаатын сэбиэтин бэрэссэдээтэлэ Руслан Васильев этэринэн, саҥардан оҥоруу кэнниттэн драматург кэбиниэтин сөргүтүөхтэрэ.
«Дмитрий Кононович уола биһиэхэ библотеканы уонна сыаналаах маллары тиэрдиэ. Итиэннэ манна уус-уран оҥоһуктары оҥорорго үөрэтэр оҕо киинэ баар буолара былааннанар», — диэн кини кэпсээтэ.
