Дьокуускайга РФ бэрэсидьиэнэ Владимир Путин көҕүлээбит «Үөрэхтээһин» национальнай бырайыагын чэрчитинэн «IT-куб» сыыппара үөрэҕин киинин тутуу үлэтин былааҥҥа киллэрдилэр. Бу туһунан Саха сирин баһылыгын уонна бырабыыталыстыбатын пресс-сулууспата иһитиннэрэр.
«Дьокуускай куорат Горькай уулуссатыгар 1500 кв миэтэрэ иэннээх, түөрт мэндиэмэннээх дьиэ атыылаһылынна. «IT- куба» үлэлээтэҕинэ Дьокуускайга үөрэх хаамыытын кыттыылаахтарын ахсаана икки тыһыынчаттан үс тыһыынчаҕа диэри улаатыаҕа», — диэн иһитиннэриигэ этиллэр.
Бу кииҥҥэ 7-18 диэри саастаах оҕолор инфокоммуникационнай технология эйгэтигэр үөрүйэхтэри, билиилэри ылаллар. Python бырагырааманы, роботиэхньикэни, мобильнай сыһыарыылары, оонньуулары оҥорорго, VR/AR бырагыраамалааһын, алгоритмика уонна логика үөрэтиэхтэрэ.
Ону таһынан 3D-моделированиеҕа, астрономияҕа, графическай дизайҥҥа уо.д.а. куурустары ыыталлар.
