Бүгүн, ахсынньы 27 күнүгэр, 08:12 чааска Дьокуускай куоракка Өлүөнэ эбэҕэ Даркылаах диэкинэн 7 киһилээх массыына ууга былдьаммытын туһунан иһитиннэрии 112 нүөмэргэ киирбит. Тимир көлө эбэҕэ көҥүллэммэтэх сиринэн айаннаабыт.
Быһылаан тахсыбыт миэстэтигэр СӨ Быыһыыр сулууспатын 2 сменалаах быыһааччылара тиийбиттэрэ. 4 киһини эвакуациялаан суһал көмөҕө илдьибиттэр. Миэстэтигэр водолазтар быыһыыр-көрдүүр бөлөҕө үлэлиир.
60-ча саастаах эр киһи өлүгүн булбуттара. Кини эбэҕэ харбыы сатаабыт, ол эрээри кыайан быыһамматах.
Ууга былдьаммыт массыынаны хостооннор кытылга таһаарбыттара. Тимир көлө иһигэр оҕо өлүгүн булбуттара.
Билиҥҥи кэмҥэ СӨ Быыһыыр сулууспатын водолазтарын үлэтэ салҕанар.
