Сэтинньи 12-13 күннэригэр Дьокуускайга «Цифровой Алмаз» үһүс федеральнай форум буолара былааннанар. Тэрээһин сүрүн тиэмэтинэн регионнарга сыыппара эйгэтин сайыннарыы буолар.
Тэрийээччилэр Россия 70 регионуттан 2000-тан тахса кыттааччы кэлэрин туһунан иһитиннэрэллэр. Маны таһынан Кытайтан, Индияттан, Казахстантан уонна Узбекистантан кытталларын туһунан биллэрбиттэр. Форум бырагырааматыгар IT салаа исписэлиистэригэр уонна экспердэригэр 40-ча тэрээһин ыытыллара былааннанар.
Дьыалабыай бырагыраамата түөрт тректэн турар: «Цифровое и инновационное развитие», «Цифровой контент», «Безопасность и телекоммуникации», «Образовательные технологии». Форумҥа сыыппара контенын сайыннарыы, ол иһигэр киинэ индустриятын, сыыппара эйгэтигэр таһыттан куттал суоһаабатын хааччыйыы (кибербезопасность), IT хампаанньалар IPO-ҕа тахсыыларын, итиэннэ пилота суох авиация систиэмэтин олоххо киллэрии туһунан боппуруостары көрүөхтэрэ.
Спикердэринэн уонна экспердэринэн федеральнай уонна өрөспүүбүлүкэтээҕи былаас уорганнарын бэрэстэбиитэллэрэ, ол иһигэр СБЕР топ-менеджердэрэ, InfoWatch, Яндекс, ОККО, Астра бөлөх, Гринатом, Positive Technologies, АЛРОСА, Нордголд уо.д.а. кыттыахтара.
