Дьокуускайга «Өйдөөх куорат — табыгастаах эйгэ» диэн Уһук Илин форума саҕаланна. Сэтинньи 27 күнүгэр тэрээһин үөрүүлээх аһыллыытын кэннэ бу хайысхаҕа үлэлии сылдьар исписэлиистэри иһиттилэр, кинилэр үлэлэрин көрдүлэр.
«Өйдөөх куораты» тутарга саҥа бырайыактары билиһиннэрдилэр. Маны сэргэ архитектордары уонна оройуон баһылыктарын, олохтоохторго табыгастаах эйгэни олохтуурга туһуламмыт куонкуруска хайдах кыттарга үөрэттилэр. Дойду тутууга министиэристибэтин бэрэстэбиитэллэрэ үлэни сыаналааһыҥҥа ханнык саҥа өрүттэр баалларын кэпсээтилэр.
Дойду тутууга уонна ОДьКХ миниистирин солбуйааччы Максим Егоров Дьокуускай куорат олохтоохторугар «Өйдөөх куорат» холонуу бырайыагын хайысхатын бэйэлэрэ талалларыгар этии киллэрдэ.
«Эһиги бэйэҕит талыахтааххыт ханнык өҥө бастакы уочарат ирдэнэрин. Холобура куттала суох куорат, «өйдөөх» светофордар, эбэтэр «өйдөөх» оптуобус тохтобуллара», — диэн Максим Егоров эттэ.
Маны тэҥэ, бырайыагы олоххо киллэриигэ регион уустук айылҕатын учуотуур ирдэнэрин бэлиэтээтэ.
«Өйдөөх куорат» бырайыак Дьокуускайга олохтонуутун былаана «өйдөөх» олорор дьиэ-уот уонна коммунальнай хаһаайыстыбаны олоххо киллэрии, тоҕоостоох, тупсаҕай уонна нэһилиэнньэ доруобуйатыгар куттала суох эйгэни олохтооһун, аныгылыы инфраструктураны тэрийии, тутууну уонна сири былааннааһыны сыппараҕа көһөрүү уонна тырааныспар сиситиэмэтин сайыннарыы курдук хабааннаах сыаллаах алта хайысхаттан турар.
Бырайыак дойду үрдүнэн 2018 сылтан «Цифровой экономика» бырайыак чэрчитинэн олоххо киирэн саҕалаабыта. Дьокуускай куорат Уһук Илиҥҥи регион куораттарыттан маҥнайгынан, 2019 сыл бэс ыйыгар бу бырайыакка кыттыспыта.
