Горнай улууһугар бүгүн СӨ гражданскай көҕүлээһин күнүнэн дьон олоҕун тупсарар туһугар биир санаанан олоххо киллэрбит ситиһиилэрин билиһиннэрэр киэҥ тэрээһини ыыттылар. 10 сыл иһигэр улууска коммерческайа суох тэрилтэлэр 108,9 мөлүйүөн солкуобай суумалаах граннары сүүйэн, 69 ППМИ бырайыагынан 144 мөлүйүөн солкуобай олоххо киллэрдилэр.
Горнай улууһугар олохтоохтор баҕа санааларынан тэриммит 50 кэммиэрчэскэйэ суох тэрилтэлэрэ, ол иһигэр 18 түөлбэ түмсүүлэрэ күүстээх үлэни ыытан улуус сайдыытыгар кылааттарын киллэрсэллэр. Ол курдук, оҕоттон саҕалаан аҕам саастаах дьон күннээҕи кыһалҕаларын быһаарар, өй-санаа өттүнэн сайыннарар, чулуу дьоммутун үйэтитэр, култуурунай, спортивнай сынньалаҥнарын тэрийэр, олорор түөлбэлэри тупсаҕай көстүүлээх, тулалыыр эйгэ чөл буоларыгар туһуламмыт бырайыактары көмүскээн, араас таһымнаах граннарга кыайан, олоххо киллэрэллэр.
