«Бэйэбит дьоммутун сир-халлаан икки ардыгар хаалларбаппыт, бары бүттүүн көмө буолуохха», — диэн этиинэн урбаанньыттар, араас түмсүү кыттыылаахтара уонна Дьокуускай олохтоохторо олус кыра кэм иһигэр түмсэ охсон Донецкай уонна Луганскай өрөспүүбүлүкэ олохтоохторугар гуманитарнай көмө быһыытынан бородуукта, ас-таҥас хомуурун саҕалаатылар.
Ол курдук, аахсыйа кыттыылаахтара үс туоннаттан тахса таҥаһы-сабы, бородуукта арааһын, суунар-тараанар тэриллэри, кинигэлэри, үөрэх тээбириннэрин, оҕо оонньуурдарын Донбаска баар олох очуругар түбэспит дьоҥҥо-сэргэҕэ көмө быһыытынан ыыттылар. Билигин волонтердар кииннэригэр күннэтэ хастыы эмэ дьааһыгынан мал-сал кэлэ турар.
Сиһилии «СӨ доброволецтара» ресурснай киин салайааччыта Айыллаан Винокуров кэпсээтэ.
