Дьокуускай куоракка бэс ыйын 16-19 күннэригэр спорт адаптивнай көрүҥнэригэр «Дьулуур» спартакиада буолуоҕа. Күрэхтэһиигэ Дьокуускай куораттан уонна 20 оройуонтан 800-тэн тахса доруобуйаларынан хааччахтаах спортсмен кыттыаҕа.
Спортсменнар олорон эрэ волейболга, голболга, чэпчэки атлетикаҕа, остуол тенниһигэр, буулдьанан ытыыга, дуобакка, саахымакка уонна төрүт оҕунан ытыыга күрэхтэһиэхтэрэ. Бастакытын спартакиада историятыгар доруобуйаларынан хааччахтаах, эчэйиилээх СВО бэтэрээннэрэ уонна кыттыылаахтара туһунан буулдьанан ытыыга киирсиэхтэрэ.
«Спартакиада бэйэлэрин холобурдарынан атыттары угуйар дьоҥҥо сомоҕолоһуу, өйөбүл, ытыктабыл бэлиэтэ буолла. Спортсменнар дьарыктарын таһыма тупсар, кыттааччылар географиялара кэҥиир, саҥа көрүҥнэр эбиллэллэр. Быйыл спартакиадаҕа анал байыаннай дьайыы кыттыылаахтара уонна бэтэрээннэрэ күрэхтэһэллэр. Спорт чөлүгэр түһүү, социальнай адаптация уонна саҥа олоххо тардыһыы чааһа буолар усулуобуйаны тэрийии биһиэхэ сүрүн суолталаах. Өрөспүүбүлүкэ салалтата уонна спорт министиэристибэтэ адаптивнай спорт көрүҥнэрин тэтимнээхтик сайыннаран иһиэҕэ», — диэн СӨ спорка уонна физическэй култуураҕа миниистири бастакы солбуйааччы Гаврил Мохначевскай эттэ.
Спартакиаданы тэрийии Россия бэрэсидьиэнэ Владимир Путин көҕүлээбит «Спорт России» федеральнай бырагырааматын сыалларыгар сөп түбэһэр.
