Муус устар 18-19 күннэригэр Дыгын оонньууларын бүтэһик сүүмэрдиир турнира «Дохсун» спорт уораҕайыгар ыытыллыаҕа.
Ол курдук, Дыгын оонньууларын чөмпүйүөнэ Алексей Уваровскай, Манчаары оонньууларын национальнай многоборьетыгар икки төгүллээх кыайыылааҕа Николай Матаннанов, хотугу многоборьеҕа Россия муҥутуур чөмпүйүөнэ Алексей Сазонов, хапсаҕайга спорт маастара Давыд Колесов итиэннэ Тимофей Большаков бүтэһик сүүмэрдээһиҥҥэ холонон көрүөхтэрэ.
Турнир бастакы күнэ атах оонньуутуттан саҕаланыаҕа, ол кэнниттэн тутум эргиирэ уонна мас тардыһыыта буолуоҕа. Иккис күҥҥэ оҕунан ытыыга, сүүрүүгэ, хапсаҕайга уонна таас көтөҕүүтүгэр күөн көрсүөхтэрэ.
Санатан эттэххэ, аҕыс кыттааччы ааттаммыттара: Дьулустан Ноговицын, Артем Дьяконов, Айсен Ботуев, Яков Дмитриев, Борис Сдвижков, Алексей Соколов, Николай Обоев уонна Павел Друзьянов.
