VIII норуоттар икки ардыларынааҕы «Азия оҕолоро» спортивнай оонньуулар саҕаланыахтарын иннинэ СӨ Бырабыыталыстыбатын бэрэссэдээтэлин бастакы солбуйааччыта, СӨ волейболун бэдэрээссийэтин кэтиир-маныыр сэбиэтин бэрэссэдээтэлэ Джулустан Борисов Саха сирин волейболга сүүмэрдэммит уолаттарын хамаандатыгар спортивнай кроссовкалары бэлэх туттарда.
Кини эдэр спортсменнарга «Азия оҕолоругар» ситиһиини баҕарда. Уолаттар өрөспүүбүлүкэлэрин чиэһин оонньууларга көмүскүөхтэрэ диэн бигэ эрэллээх.
«Мин биһиги эдэр спортсменнарбытынан киэн туттабын. Кинилэр волейболга номнуо улахан ситиһиилэри ситистилэр. Бу кроссовкалар — эһиги ситиһиигитигэр эрэл уонна биһиги өйөбүлбүт бэлиэтэ буолаллар. Эһиги спортка инники кэскилбит буолаҕыт. Төрөөбүт дойдугутугар тэриллэр норуоттар икки ардыларынааҕы таһымнаах күрэххэ бэйэҕит күүскүтүн, түмсүүлээххитин көрдөрүөххүт диэн эрэнэбин. Ситиһиилэри! Бэйэҕит күүскүтүгэр итэҕэйиҥ!», – диэтэ Джулустан Борисов.
Саха сирин волейболга сүүмэрдэммит уолаттарын хамаандатыгар 15-16 саастаах 12 спортсмен киирсэр. Старшай тренердэрэ — Айсен Жерготов. Оҕолор Куораттан, Намтан, Чурапчыттан, Амматтан, Тааттаттан, Сунтаартан, Эдьигээнтэн төрүттээхтэр.
Ыам ыйыгар Уфаҕа Саха сирин сүүмэрдэммит хамаандата сыллата ыытыллар волейболга норуоттар икки ардыларынааҕы турнирга кыайыыны ситиспитэ. Бу турнир Улуу Кыайыы 79 сылыгар анаммыта. Ону тэҥэ кулун тутарга хамаанда Уһук Илиннээҕи Уокурук чемпионатыгар үрүҥ көмүс мэтээли ылбыта.
Ону таһынан кроссовкалары Саха сирин волейболга сүүмэрдэммит кыргыттарын хамаандатыгар эмиэ ылбыттар. Бүгүҥҥү күҥҥэ хамаанда Чурапчыга сылдьар.
